ASTANA, 10 qaraşa. Qazaqstan Prezidenti Qasım-Jomart Toqaev Halıqaralıq «Qazaq tili» qoğamınıñ X qwrıltayına qatısıp, memlekettik tildiñ märtebesin nığaytu men onı damıtu mäselelerine toqtaldı. Memleket basşısı ana tili mäselesi memlekettik, sayasi jäne wlttıq mañızı bar taqırıp ekenin atap ötti. Onıñ aytuınşa, qazaq tiliniñ abıroy-bedelin arttıru – bükil qoğamğa ortaq mindet.

Prezident «Qazaq tili» qoğamınıñ memlekettik tildiñ damuına qosıp kele jatqan ülesin joğarı bağaladı. Sonday-aq 1989 jılı akademikter Äbduäli Qaydar men Ömirzaq Aytbaywlınıñ bastamasımen qwrılğan wyımnıñ tarihi mañızın atap ötti.

Qasım-Jomart Toqaev qazaq tilin cifrlıq keñistikte damıtuğa erekşe nazar audardı. Atap aytqanda, wlttıq cifrlıq derekter qorın qalıptastıru, arhivter men kitaphanalardağı qazaqtildi mwralardı cifrlandıru jäne köptildi sözdikter äzirleu qajettigin ayttı.

Sonımen qatar Prezident qazaq tilindegi sapalı cifrlıq kontentti köbeytip, balalar men jastarğa arnalğan bilim beru önimderin damıtu mañızdı ekenin jetkizdi. Memleket basşısı qazaq tiliniñ bolaşağı üşin memleket pen qoğam birlese jwmıs isteui kerektigin atap ötti.