قازاقستانداعى ەڭ ۇزاق تەمىرجول باعىتى سانالاتىن №37/38 «ماڭعىستاۋ – سەمەي» پويىزى جاڭا جولاۋشىلار ۆاگوندارىمەن تولىقتى. جاڭارتىلعان ۆاگوندار وتاندىق RWS Wagon زاۋىتىندا شىعارىلعان. «قازاقستان تەمىر جولى» كومپانيياسىنىڭ مالىمەتىنشە, باتىس وڭىرگە 70-تەن استام جاڭا ۆاگون جەتكىزىلگەن. سونىمەن قاتار №109/110 «ماڭعىستاۋ – اقتوبە» پويىزىنىڭ قۇرامى دا جاڭارتىلدى. جاڭارتىلعان «ماڭعىستاۋ – سەمەي» پويىزى توعىز ۆاگوننان تۇرادى. ونىڭ تورتەۋى – كۋپە, تورتەۋى – پلاتسكارت جانە بىرەۋى – ۆاگون-مەيرامحانا. پويىز جالپى سانى 331 جولاۋشىعا ارنالعان ورىنمەن جابدىقتالعان. جاڭا ۆاگونداردا جولاۋشىلارعا قولايلى جاعداي جاساۋ ۇشىن Wi-Fi, USB قۋاتتاۋ پورتتارى, 220 ۆولьتتىق روزەتكالار جانە بيودارەتحانالار ورناتىلعان. سونداي-اق اۋا باپتاۋ, اۋانى زالالسىزداندىرۋ جانە تەمپەراتۋرانى رەتتەۋ جۇيەلەرى قاراستىرىلعان. قاۋىپسىزدىكتى قامتاماسىز ەتۋ ماقساتىندا ۆاگوندار بەينەباقىلاۋ جانە ورت سوندىرۋ جۇيەلەرىمەن جابدىقتالعان. بۇدان بولەك, نارەستە جورگەكتەۋگە ارنالعان ارنايى ۇستەلدەر مەن جەكە سەيفتەر دە بار. ۆاگون پاركىن جاڭارتۋ جولاۋشىلارعا قىزمەت كورسەتۋ ساپاسىن ارتتىرۋعا جانە تەمىرجول كولىگىندەگى جايلىلىق دەڭگەيىن جاقسارتۋعا باعىتتالعان.