الماتىدا بەلگىلى اقىن, اۋدارماشى, قازاقستاننىڭ حالىق جازۋشىسى قۋاندىق شاڭعىتباەۆتىڭ تۋعانىنا 100 جىل تولۋىنا وراي «جاقۇت جىردىڭ جاۋھارى» اتتى ەسكە الۋ كەشى وتتى. شارا ۇلتتىق كىتاپحانانىڭ قابىرعاسىندا ۇيىمداستىرىلىپ, اقىن مۇراسىن وسكەلەڭ ۇرپاققا دارىپتەۋدى ماقسات ەتتى, دەپ حابارلايدى Shalqar.kz تىلشىسى سىرتقى ىستەر مينيسترلىگىنە سىلتەمە جاساپ.

كەشكە قوعام جانە مەملەكەت قايراتكەرلەرى, زييالى قاۋىم وكىلدەرى, جازۋشىلار, ستۋدەنتتەر, ساربازدار مەن تۇركى دۇنيەسى جازۋشىلار وداعىنىڭ توراعاسى ۇلىقبەك ەسداۋلەت جانە اقىننىڭ قىزى گاۋحار شاڭعىتباەۆا قاتىستى.

اتالعان شارا اياسىندا قۋاندىق شاڭعىتباەۆتىڭ شىعارماشىلىعىنا ارنالعان كىتاپ جانە فوتوكورمە ۇيىمداستىرىلدى. ەكسپوزيتسيياعا ۇلتتىق كىتاپحانا قورىنداعى كىتاپتار مەن وتباسى مۇراعاتىنان الىنعان سيرەك سۋرەتتەر قويىلدى.

كەش سوڭىندا اقىننىڭ «ماحاببات پەن عاداۋات» اتتى كىتابى كىتاپحاناعا جانە كەشكە كەلگەن قوناقتارعا سىيعا تارتىلدى.

قۋاندىق شاڭعىتباەۆ – پوەزييا مەن پاراساتتى اۋدارما ونەرىنىڭ بيىگىندە تۇرعان بىرەگەي قالامگەر. ونىڭ شىعارمالارى – قازاق رۋحانيياتىنىڭ التىن قورىنا اينالعان قازىنا.