Әл-Фараби атындағы Қазақ ұлттық университетінің сахнасында жүректерді тербеген ерекше көрініс орын алды. Ұлы ақын Абай Құнанбайұлының 180 жылдығына орай 1000 студент пен оқытушы бір мезетте «Көзімнің қарасы» және «Желсіз түнде жарық ай» әндерін хормен шырқады, деп хабарлайды Shalqar.kz тілшісі Ғылым және жоғары білім министрлігіне сілтеме жасап.

Университет ректоры Жансейіт Түймебаев Абай мұрасын насихаттау – әрбір азаматтың парызы екенін атап өтті. Ол қазіргі жастардың данышпан ойшылдың шығармаларына деген қызығушылығы артып келе жатқанын ерекше айтты.

«Президент Қасым-Жомарт Тоқаев Ұлы Абайдың 180 жылдығын жоғары деңгейде атап өтуге тапсырма берген болатын. Осыған орай ҚазҰУ қабырғасында ғылыми конференциялар, симпозиумдар, кездесулер мен танымдық шаралар белсенді өтуде. Университет жанындағы Абай ғылыми-зерттеу институты 2009 жылдан бері табысты жұмыс істеп келеді. Институттың еңбегімен 10 томдық «Абайтану антологиясы» жарыққа шықты», – деді ректор.

Музыка мен рухтың үйлескен бұл шара – Абай әлеміне деген құрметтің тағы бір айқын көрінісі.