ۇلتتىق كىتاپ كۇنى – بيىل العاش رەت قازاقستاندا رەسمي تۇردە اتالىپ وتكەنىمەن, ونىڭ اينالاسىندا وربيتىن يگى ىستەر ەل ىشىندە الدەقاشان باستالىپ كەتكەندەي. سونىڭ جارقىن مىسالى – «حابار» اگەنتتىگىنىڭ ۇيىمداستىرعان الەۋمەتتىك اكتسيياسى, دەپ حابارلايدى Shalqar.kz.

باس قالاعا جاقىن ورنالاسقان اقمولا وبلىسىنداعى تالاپكەر اۋىلىندا جاڭادان سالىنعان «جايلى مەكتەپ» جوباسى اياسىنداعى مەكتەپ-ليتسەيدىڭ كىتاپحاناسىنا اگەنتتىك 100 كوركەم جانە موتيۆاتسييالىق باعىتتاعى كىتاپتى تارتۋ ەتتى. الەمدىك كلاسسيكتەر مەن زاماناۋي اۆتورلاردىڭ ۇزدىك تۋىندىلارى – جاس بۋىننىڭ رۋحاني دامۋىنا سەرپىن بەرىپ, وقۋعا دەگەن قىزىعۋشىلىعىن وياتۋدى كوزدەيدى.

مەكتەپ ۇجىمى بۇل سىيلىقتى قۋانا قابىلدادى. ديرەكتوردىڭ مىندەتىن اتقارۋشى باقىت شاكىروۆا:
– جاڭا مەكتەپتىڭ كىتاپ قورى ەندى عانا جيناقتالىپ جاتىر. «حاباردىڭ» سىيى – بىز ۇشىن ۇلكەن قولداۋ. بۇل وقۋشىلاردىڭ موتيۆاتسيياسىن ارتتىرىپ, وي-ساناسىن بايىتۋعا, بىلىمگە دەگەن قۇشتارلىعىن وياتۋعا جول اشادى, – دەيدى.

اكتسييا اياسىندا ەلورداداعى «حان شاتىر» ساۋدا ورتالىعىندا دا كىتاپسۇيەر قاۋىمعا ارناپ ەرەكشە شارا وتتى. اگەنتتىك قىزمەتكەرلەرى وزدەرى وقىعان جانە باعالاعان كىتاپتارىن كوپشىلىكپەن بولىسىپ, كلاسسيكا مەن زاماناۋي ادەبيەتتىڭ التىن كوپىرىن ورناتتى.

«حابار» اگەنتتىگىنىڭ باسقارما توراعاسى كەمەلبەك ويشىباەۆ تا بۇل باستامانىڭ ماڭىزىن اتاپ وتتى:

– ادامنىڭ قالىپتاسۋىندا كىتاپتىڭ ورنى ەرەكشە. سوندىقتان بىز مەكتەپتەگى وقۋشىلارعا ۇلگى بولا وتىرىپ, جالپى قوعامدا بىلىم كۋلьتىن قالىپتاستىرۋعا تىرىسامىز. بۇل يدەيانى تەك ەفيردە عانا ەمەس, وسىنداي ناقتى ىستەرمەن دە جۇزەگە اسىرىپ كەلەمىز. كىتاپ وقيتىن ۇلت – بولاشاعى مىقتى ۇلت, – دەدى ول.