Алматыда қазақстандық композиторлардың камералық оркестрге арналған шығармалар жинағының тұсаукесері өтті. Бұл жинақ — “Тәуелсіздік ұрпақтары” мемлекеттік гранты аясында жарық көрген ерекше жоба, деп хабарлайды Shalqar.kz тілшісі Сыртқы Істер министрлігіне сілтеме жасап.

Жоба авторы — халықаралық байқаулардың жеңімпазы Аршат Шәріп. Ол 2024 жылы «Мәдениет» бағыты бойынша грант иегері атанып, осы еңбекті жарыққа шығарды.

«Біздің мақсат — жас музыканттардың орындау репертуарын ұлттық шығармалармен толықтыру. Бұл жинақ — қазақ классикасын жаңа буынға жеткізудің бір жолы», — дейді автор.

Жинаққа қазіргі қазақстандық композиторлардың камералық оркестрге арналған шығармалары енген. Оларды Giovani Talenti оркестрі орындаған. Оркестр құрамында Ахмет Жұбанов атындағы мамандандырылған музыкалық мектеп-интернатында оқитын 25 жас талант бар.

Айта кетейік, іс-шара қазақ музыкасының негізін қалаушылардың бірі Ахмет Жұбановтың туған күніне орай ұйымдастырылды.

“Тәуелсіздік ұрпақтары” гранты 2021 жылдан бері президент Қасым-Жомарт Тоқаевтың бастамасымен талантты жастарды қолдау мақсатында табысталып келеді.