ەلوردادا 1 مامىر – قازاقستان حالقىنىڭ بىرلىگى كۇنى اياسىندا وتكەن «بىرلىك جۇگىرىسى-2025» رەسپۋبليكالىق جارىسىنا 3 مىڭنان استام ادام قاتىستى. اۋقىمدى ىس-شارا قازاقستان حالقى اسسامبلەياسىنىڭ 30 جىلدىعىنا ارنالدى, دەپ حابارلايدى Shalqar.kz.

«بىرلىككە 30 جىل – اسسامبلەياعا 30 جىل» ۇرانىمەن وتكەن مارافونعا كاسىبي سپورتشىلاردان باستاپ بەلسەندى ومىر سالتىن ۇستاناتىن ازاماتتارعا دەيىن تۇرلى جاستاعى جانە ۇلت وكىلدەرى قاتىستى. قاتىسۋشىلار EXPO قالاشىعىنان باستاپ «بايتەرەك» مونۋمەنتىنە دەيىنگى باعىتتى جۇگىرىپ وتتى.

جارىس بىر ۋاقىتتا ەلىمىزدىڭ 20 وڭىرىندە ۇيىمداستىرىلىپ, دوستىق پەن بىرلىكتىڭ نىشانىنا اينالدى. قاتىسۋشىلار تەك قاشىقتىقتى ەڭسەرىپ قانا قويماي, «تازا قازاقستان» ەكولوگييالىق اكتسيياسىنا دا ۇلەس قوستى.

مارافون بىرنەشە ساناتتا وتتى: ەڭ جاس جانە ەرەكشە قاجەتتىلىكتەرى بار ازاماتتار ۇشىن 1 كم قاشىقتىق, سكانديناۆييالىق جۇرىس (5 كم), جاپپاي جۇگىرۋ (10 كم), كاسىبي سپورتشىلار ۇشىن 21,1 كم جانە كوماندالىق ەستافەتا (30 كم).

ۇيىمداستىرۋشىلاردىڭ ايتۋىنشا, مۇنداي شارالار حالىقتى بىرىكتىرىپ قانا قويماي, سالاۋاتتى ومىر سالتىن ناسيحاتتاۋعا سەرپىن بەرەدى.