4 мамыр күні «Қазанат» атшабарында шын жүйріктер анықталады. Астанада Жеңістің 80 жылдығына арналған «Astana Cup» республикалық бәйге турнирі өтеді. Бұл – классикалық ат жарысы мен ұлттық бәйге түрлерін қамтитын айтулы дода, деп хабарлайды Shalqar.kz.

Жүлде қоры – 120 миллион теңге. Бұл – елорда төрінде бұрын-соңды болмаған ауқымды бәйгелердің бірі. Қазақстанның түкпір-түкпірінен келген таңдаулы тұлпарлар ұшқыр бәйгеде 1200, 1600, 1800 және 2000 метрге шабады.
Сондай-ақ, дәстүрлі 12 шақырымдық “топ бәйге” мен 18 шақырымдық “аламан бәйге” де өтеді.

Турнирдің ашылу салтанаты 4 мамыр күні сағат 12:00-де өтеді.
Келушілер үшін кіру тегін.
«Қазанат» атшабарына барғысы келетіндер үшін арнайы №303, №309 және №323 автобустар қатынайды.

Шараны Астана қаласы әкімдігі, Туризм және спорт министрлігі, сондай-ақ «Ұлттық спорт қауымдастығы» бірігіп ұйымдастырып отыр.