15 مامىر كۇنى رۋدنىي قالاسىندا “تازا قازاقستان” ەكولوگييالىق اكتسيياسى اياسىندا ەرەكشە فورماتتاعى — ەكوجۇگىرۋ شاراسى وتتى. تابيعاتتى قورعاۋ مەن سالاۋاتتى ومىر سالتىن ناسيحاتتاۋعا ارنالعان بۇل ىس-شارا توبىل وزەنىنىڭ جاعالاۋىندا ۇيىمداستىرىلدى, دەپ حابارلايدى Shalqar.kz.

جۇگىرۋگە جاتتىقتىرۋشىلار, نۇسقاۋشىلار, سپورتشىلار جانە قالا تۇرعىندارى قاتىستى. ولار تابيعات اياسىندا جۇگىرىپ قانا قويماي, قورشاعان ورتانى تازا ۇستاۋ جونىندە قوعامعا ۇلگى كورسەتتى.

ىس-شارانى رۋدنىي قالالىق دەنە شىنىقتىرۋ جانە سپورت بولىمى ۇيىمداستىردى.

“تازا قازاقستان” جوباسى – بۇل تەك قوقىس جيناۋ ەمەس, بۇل – ەكولوگييالىق مادەنيەتتى قالىپتاستىرۋ جولىنداعى ناقتى قادام,” – دەيدى ۇيىمداستىرۋشىلار.

ايتا كەتەيىك, رۋدنىي قالاسىندا بۇل باستاما اياسىندا تازالىق جۇمىستارى مەن كوگالداندىرۋ جۇيەلى تۇردە جۇرگىزىلىپ كەلەدى. مۇنداي اكتسييالار جاستاردىڭ ەكوسانا مەن تابيعاتقا دەگەن جاۋاپكەرشىلىگىن ارتتىرۋعا باعىتتالعان.