استانادا وتكەن KIOSH 2025 حالىقارالىق كورمەسىندە دروندار مەن روبوتتار جاي عانا تەحنيكالىق جاڭالىق ەمەس, جۇمىس ورنىنداعى قاۋىپسىزدىكتىڭ باستى كەپىلى رەتىندە تانىستىرىلدى. ەڭبەكتى قورعاۋ جانە وندىرىستىك قاۋىپسىزدىك سالاسىنداعى ەڭ ىرى شارا بيىل XIII رەت ۇيىمداستىرىلىپ وتىر, دەپ حابارلايدى Shalqar.kz.

95 كومپانييا, 12 ەلدىڭ وكىلدەرى, جۇزدەگەن مامان — بارلىعى ەڭبەك قاۋىپسىزدىگىنىڭ جاڭا داۋىرىنە قادام باسىپ جاتقانىن كورسەتتى.

«بۇگىندە جۇمىس ورنىنداعى قاۋىپسىزدىك قاعازباستىلىقتان ارىلىپ, تولىقتاي تسيفرلىق جۇيەگە كوشىپ جاتىر. كەن ورىندارى مەن وندىرىستىك الاڭداردا دروندار مەن روبوتتاردى قولدانۋ – جۇمىسشىلاردى تاۋەكەلدەن قورعاۋدىڭ تيىمدى جولى. شەتەلدىك ارىپتەستەرىمىز ناقتى مىسالدارمەن بولىستى, بۇل تاجىريبە ەلىمىزدە دە ەنگىزىلۋى مۇمكىن», – دەدى مەملەكەتتىك ەڭبەك ينسپەكتسيياسى كوميتەتى توراعاسىنىڭ مىندەتىن اتقارۋشى ەربولات ابىلحاتين.

ايتا كەتەيىك, بىلتىردان باستاپ ەلىمىزدە «نولدىك جاراقات» تۇجىرىمداماسى ەنگىزىلگەن. بۇل – تەك ەرەجەلەر جيىنتىعى ەمەس, ادام ومىرىن ساقتاپ قالۋعا باعىتتالعان جاڭا كوزقاراس.

KIOSH 2025 كورمەسىنە قر پرەمьەر-مينيسترىنىڭ ورىنباسارى ەرمەك كوشەرباەۆ, حالىقارالىق ەڭبەك ۇيىمى, الەمنىڭ تۇرلى ەلدەرىنەن كەلگەن ساراپشىلار, ەڭبەك ينسپەكتورلارى مەن كاسىبي بىلىم بەرۋ مەكەمەلەرىنىڭ وكىلدەرى قاتىستى.

«ەڭبەكتى قورعاۋ – بۇل جاي عانا تالاپ ەمەس. بۇل – ادامنىڭ ومىرى, دەنساۋلىعى مەن اماندىعى. بىز ناقتى جۇمىس ىستەيتىن مامانداردى تىڭداي وتىرىپ قانا شىنايى قاۋىپسىز ەڭبەك جاعدايىن جاساي الامىز», – دەدى ۇكىمەت باسشىسىنىڭ ورىنباسارى وز سوزىندە.

تسيفرلاندىرۋ, جاساندى ينتەللەكت پەن اۆتوماتتاندىرىلعان شەشىمدەر – ەندى تەك تەحنولوگييا ەمەس, جۇمىسشىلاردىڭ قاۋىپسىزدىگىنە تىكەلەي اسەر ەتەتىن فاكتور.