1 ماۋسىم – بالالاردى قورعاۋ كۇنىنە وراي ەلىمىزدىڭ تۇكپىر-تۇكپىرىنەن كەلگەن وقۋشىلار قازاقستان پرەزيدەنتىنىڭ رەزيدەنتسيياسى – اقوردانىڭ قۇرمەتتى قوناعى بولدى. كۇمبەزى كوك سارايدا ولار ۇشىن ارنايى ەكسكۋرسييا ۇيىمداستىرىلىپ, ۇمىتىلماس اسەر سىيلادى, دەپ حابارلايدى Shalqar.kz.

بۇل كۇن – جاي عانا سەرۋەن ەمەس, ەل بولاشاعىنا سەنىم ارتقان قۇرمەتتىڭ كورىنىسى. ەكسكۋرسيياعا وقۋ وزاتتارى, حالىقارالىق جانە رەسپۋبليكالىق وليمپيادالاردىڭ جەڭىمپازدارى, سپورت ساڭلاقتارى مەن ەرەكشە ەرلىگىمەن كوزگە تۇسكەن باتىل بالالار شاقىرىلدى.

سونداي-اق, ولاردىڭ قاتارىندا كوپبالالى وتباسىنان شىققان بالالار, اتا-اناسىنىڭ قامقورلىعىنسىز قالعاندار مەن ەرەكشە قاجەتتىلىگى بار وقۋشىلار دا بولدى.

بالالار اقوردانىڭ ورتالىق سالتاناتتى حولىن, رەسمي قابىلداۋلار وتەتىن زالداردى, پرەزيدەنت كىتاپحاناسىن جانە رەزيدەنتسييا اۋماعىنداعى كورىكتى باقتى ارالادى. بۇل – كوپشىلىكتىڭ كوزىنە تۇسە بەرمەيتىن ەرەكشە نىسانداردىڭ بىرى.

وقۋشىلارعا مەملەكەت باسشىسى اتىنان ارنايى ەستەلىك سىيلىقتار تابىستالىپ, ولاردىڭ مەرەكەلىك كوڭىل كۇيى ەسەلەنە تۇستى.

مەملەكەتتىك رەزيدەنتسييانى ارالاپ قانا قويماي, استاناعا كەلگەن وقۋشىلار ەلوردانىڭ ەڭ ادەمى جانە تاريحي ورىندارىن دا تاماشالاۋعا مۇمكىندىك الدى.