5 маусым күні Әбілхан Қастеев атындағы Мемлекеттік өнер музейінде Қытайдың ХХ–ХХI ғасырдағы әйгілі суретшілерінің еңбектері ұсынылатын ерекше көрме ашылады. «Қытай өнерінің ой-мақсаттары» атты экспозицияда 50-ге жуық кескіндеме, графика және мүсін туындылары қойылады, деп хабарлайды Shalqar.kz.

Көрмені ұйымдастыруға Қытай Ұлттық көркемөнер музейі мен ҚР Мәдениет және ақпарат министрлігі ұйытқы болған.

Авторлар өз жұмыстарында дәстүрлі Сиэйи (еркін бейнелеу) стиліне сүйене отырып, тек сыртқы сұлулықты ғана емес, өнердің ішкі философиясын да жеткізуге тырысқан.

Айта кетейік, Қастеев музейі 2018 жылдан бастап Жібек жолы бойындағы музейлер мен галереялардың халықаралық альянсына мүше. Бұл шығармашылық байланысты нығайтып, түрлі елдер арасындағы мәдени диалогқа жол ашып отыр.