Маусым айы – көпшіліктің асыға күтетін мезгілі. Балалар демалысқа шығып, ересектер жазғы демалысын жоспарлап жатқаны анық. Елімізде шетелге шықпай-ақ, тамаша табиғат аясында тынығуға болатын орындар жетерлік. Біз Қазақстандағы ең танымал әрі қолжетімді демалыс бағыттарына шолу жасадық, деп хабарлайды Shalqar.kz.


1. Алакөл – дертке дауа, жанға шипа

Шығыс Қазақстан мен Абай облыстарының шекарасында орналасқан Алакөл – еліміздегі ең танымал демалыс орындарының бірі. Тұзды суы тері ауруларына пайдалы, жағажайы кең әрі таза. Теміржол және автожол арқылы оңай жетуге болады. Қонақ үйлер бағасы – 8 000 теңгеден бастап.

2. Бурабай – «қазақстандық Швейцария»

Ақмола облысында орналасқан көркем жер – отбасылық демалыс үшін таптырмас орын. Көл, тау, орман – бәрі бір жерде. Атпен серуендеу, қайықпен жүзу, велосипедпен тауға шығу сияқты белсенді демалыс түрлері бар. Нұр-Сұлтаннан небәрі 250 км.

3. Балқаш – құмды жағажай мен жазғы жел

Балқаш көлі – Қазақстандағы ең ірі көлдердің бірі. Су температурасы шілде айында +25°C-қа дейін жылынады. Қалалық жағажайлардан бөлек, табиғи жағажайлар да бар. Жастар жиі демалатын орындардың бірі.

4. Түркістан – тарих пен демалысты ұштастырғыңыз келсе

Жаз – рухани саяхат жасауға да тамаша уақыт. Түркістан – тек тарихи орын ғана емес, заманауи туризм орталығына айналды. «Керуен-Сарай» туристік кешені, Ясауи кесенесі, этноауыл – балалар мен ересектер үшін де қызық.

5. Көлсай мен Қайыңды – табиғаттың ғажайыбы

Табиғи сұлулықты сүйетіндер үшін Көлсай мен Қайыңды көлдері – таптырмас бағыт. Алматыдан 5-6 сағаттық жолмен жетуге болады. Тау мен орман арасындағы саф ауа, мөлдір көлдер – фотосессия мен жан тыныштығы үшін керемет орта.

6. Бюджет болмаса – қаладан шықпай-ақ демалыңыз

Егер алысқа баруға мүмкіндік болмаса, өз қалаңыздағы парк, жағажай, кітапхана мен музейлерді қайта ашып көріңіз. Балаларға арналған тегін жазғы лагерьлер мен шараларды да назардан тыс қалдырмаңыз.