جازۋشىنىڭ بىرىنشى ايەلىنىڭ اتى – قانشايىم. ول بىر بايدىڭ كەلىنى بولعان كورىنەدى. اۋىلدا اسكەري قىزمەتتە جۇرگەن عابەڭ قانشايىمدى الىپ قاشىپ, ۇيىنە اكەلىپ تۇسىرگەن ەكەن. كوپ ۇزاماي, وزى ورىنبورعا رابفاكقا وقۋعا كەتەدى دە, قانشايىم اكە-شەشەسىنىڭ قولىندا قالادى, دەپ حابارلايدى Shalqar.kz.

ورىنبوردا جۇرگەنىندە پەداگوگيكا ينستيتۋتىندا وقيتىن قۇسني ياعفاروۆا دەگەن تاتار قىزىنا عاشىق بولادى. كوپ ۇزاماي ەكەۋى ۇيلەنەدى. عابەڭ قۇسني اپايمەن قىرىق جىل وتاسادى. كوپ سوزى جوق, اقىلىنا كوركى ساي, پاراساتى بىر باسىنا جەتىپ ارتىلاتىن قۇسني ايەل رەتىندە باقىتتى بولدى ما, بولمادى ما, ول جاعىن تاپ باسىپ ايتۋ قيىن. بىراق, عابەڭنىڭ بارلىق ەركەلىگىن كوتەرگەنى – شىندىق. جازۋشىنى الاقانىنا سالىپ, ايالاپ وتكەنىن كوزكورگەندەر جىر عىپ ايتادى. سابيت مۇقانوۆتىڭ ۇيىندەگى مارييام اپايدىڭ سوزىمەن ايتساق: «قۇسني بىر اياۋلى جان ەدى. بييازى, جىبەكتەي ەسىلگەن, جۋاس ادام ەدى. عابيتتىڭ قانداي قىلىعى بولسا دا, ۇنسىز توزدى. كۇيەۋىن بالاشا ماپەلەي كۇتتى, بىر اۋىز قاتتى سوز ايتپادى, سوز قايىرمادى. تاماقتى قانداي دامدى پىسىرۋشى ەدى, ۇستاعان دۇنيەسى قانداي!.. جۇرگەن جۇرىسى بىلىنبەيتىن, زييانسىز, كونبىس ادام بولاتىن. عابيت نە ايتسا دا – زاڭ, تۇن كەلە مە, كۇن كەلە مە, بىر اۋىز سوز ايتپايتىن. بار دامدىسىن اۋزىنا توسىپ, ۇستى-باسىن مۇنتازداي عىپ كۇتتى. شالباردى ۇتىكتەگەن كەزدە سۋ ەمەس, حوش يىستى اتىر قۇيىپ ۇتىكتەگەندى سول قۇسنيدان كوردىم».

قۇسني اپاي اقىلى دا, ايلاسى دا بىر باسىنا جەتىپ ارتىلاتىن پاراسات يەسى بولعان دەپ بىلەمىز. اقىن قادىر مىرزا الي «يىرىم» اتتى ەستەلىك-ەسسەسىندە دە وسى قۇسني اپايدىڭ ايەل زاتىنىڭ ىشىندەگى ەڭ بىر اقىلدىسى ەكەنىن اشىپ كورسەتكەن.

الايدا, جاراتىلىسىنان سەرى, سال عابەڭ جاس اكتريسا رايسا مۇحامەديياروۆاعا عاشىق بولىپ قالعان. قازاقستاننىڭ ەڭبەك سىڭىرگەن ارتىسى رايسا – رايا مۇحامەديياروۆانىڭ اكەسى ماجيت تورە تۇقىمىنان, ال اناسى مەڭسۇلۋ تاتار قىزى ەكەن. ماڭدايعا جازعاننان اسپايسىڭ دەگەن راس. ايتپەسە, رايا اپاي وزى تۇسكەن شەت تىلدەر ينستيتۋتىن بىتىرىپ, اعىلشىن تىلىنىڭ مۇعالىمى بولىپ شىققاندا ۇلى جازۋشىمەن جولى تۇيىسەر مە ەدى, تۇيىسپەس پە ەدى, كىم بىلسىن?! ۇلى جازۋشى مەن تالانتتى اكتريسانىڭ اراسىنداعى دراما 1962 جىلدان باستالادى. اراعا ەكى جىل سالىپ, عابەڭنىڭ قىرىق جىل وتاسقان جارى قۇسني اپاي دۇنيە سالادى. جىلعا جەتپەي عابەڭ توسەك جاڭعىرتىپ, وزىنەن 37 جاس كىشى رايسا سۇلۋمەن شاڭىراق كوتەرەدى. بىراق, ەكەۋىنىڭ وتباسىلىق عۇمىرى باياندى بولدى دەۋ قيىن. وعان اراداعى جاس ايىرماشىلىعى, رايسا اپايدىڭ ونەردەن قول ۇزگىسى كەلمەۋى, ال عابەڭنىڭ وعان قارسى بولۋى ىقپال ەتكەن دەپ توپشىلاۋعا بولادى. ايتپاقشى, سابيت مۇقانوۆ پەن عابيت مۇسىرەپوۆتىڭ اراسىنىڭ سۋىسىپ كەتۋىنە رايسا اپايدىڭ دا ازداپ قاتىسى بولۋى مۇمكىن. سەبەبى, سابەڭ قۇداسىنىڭ قۇسنيدىڭ جىلى وتپەي توسەك جاڭعىرتۋىن اسا قۇپتاماعان كورىنەدى. تىپتى, عابەڭ مەن رايسا اپايدىڭ ۇيلەنۋ تويىنا دا بارماپتى (توي شاعىنداۋ وتسە كەرەك – ج.ا.). كەيىننەن دە بىرنەشە رەت سوزگە كەلىپ قالىپ جۇرگەن كورىنەدى. وتىرعان جەردە ىلىپ-شالىپ, تيىسىپ وتىراتىن بولىپتى. بىراق, بىر-بىرىنەن بىرجولا سۋىسىپ كەتپەگەن. تاعدىر قوستى دەگەن سول شىعار, بۇگىندە مۇسىرەپوۆ پەن مۇقانوۆتىڭ مۋزەيىنە دەيىن بىرگە.

جازۋشىنىڭ تورتىنشى جانە سوڭعى ايەلى – عازيزا بيسەنوۆا. ماماندىعى ماشينيستكا. كەزىندە مۇحتار اۋەزوۆتىڭ ماشينيستكاسى بولعان, عابەڭمەن دە شىعارمالارىن باسىپ بەرىپ جۇرىپ تابىسقان. بۇلار باس قوسقاندا عازيزا اپايدىڭ جاسى الپىستىڭ ار جاق, بەر جاعىندا بولعان.

بىراق, بۇلاردىڭ تورتەۋى دە ەسىل ازاماتتى ەڭ ۇلى مۇراتقا جەتكىزبەگەن…

عابيت مۇسىرەپوۆ تولەباەۆ پەن قازىرگى قاراساي باتىر كوشەلەرىنىڭ قيىلىسقان تۇسىندا تۇرعان ەكەن. سول ماڭدا ديماش احمەتۇلى قوناەۆتىڭ ەسكەرتكىشى بار. كلاسسيك جازۋشى سول توڭىرەكتە تىنىعىپ, دەمالاتىن كورىنەدى. بىردە جازۋشى شەرحان مۇرتازا سەرۋەندەپ جۇرىپ عابيت مۇسىرەپوۆپەن كەزدەسىپ قالادى. شەر-اعاڭنىڭ ايتۋىنشا, سول جولى جازۋشى: «جالعىز ۇلى باردىڭ شىعار-شىقپاس جانى بار. ەكى ۇلى باردىڭ وكپە-باۋىر, جالى بار. ۇش ۇلى باردىڭ بۇحارادا مالى بار. تورت ۇلى باردىڭ اسپانعا سالعان جولى بار… مەندە سونىڭ بىرەۋى دە جوق», – دەگەن ەكەن. «بىر كەم دۇنيە» دەمەسكە امالىڭ جوق. بىراق, قۇدايعا شۇكىر, جازۋشىنىڭ ۇيىندە كەستەتىگەرلەر از بولماعان.