ت. جۇرگەنوۆ اتىنداعى قازاق ۇلتتىق ونەر اكادەميياسىندا ۇلى اقىن, ويشىل ارى كومپوزيتور اباي قۇنانبايۇلىنىڭ 180 جىلدىعىنا ارنالعان «ۇيىقتاپ جاتقان جۇرەكتى ان وياتار» اتتى پوەزييا جانە مۋزىكا كەشى وتتى, دەپ حابارلايدى Shalqar.kz “مادەنيەت جانە اقپارات مينيسترلىگىنىڭ” تەلەگرامم كانالىنا سىلتەمە جاساپ. ىس-شاراعا ونەرسۇيەر قاۋىم, سونداي-اق اكادەمييانىڭ ۇستازدارى مەن ستۋدەنتتەرى جينالدى.

كەش «جەلسىز تۇندە جارىق اي» انىمەن اشىلىپ, كورەرمەن ابايدىڭ وزگە دە تانىمال شىعارمالارىن بىرگە ورىنداپ, ەرەكشە رۋحاني كوڭىل-كۇي قالىپتاستىردى.

باعدارلامادا «جارق ەتپەس قارا كوڭىلىم نە قىلسا دا...», «ايتتىم سالەم, قالامقاس», «سەگىز اياق», «قاراڭعى تۇندە تاۋ قالعىپ», «ەسىڭدە بار ما, جاس كۇنىڭ?» جانە باسقا دا كلاسسيكاعا اينالعان اندەر شىرقالدى.

ابايدىڭ ولەڭدەرى كونتسەرتمەيستەرلەردىڭ سۇيەمەلدەۋىمەن وقىلدى. كەشتە بەلگىلى مادەنيەت جانە ونەر قايراتكەرلەرى ونەر كورسەتتى. سونىمەن قاتار اكادەمييانىڭ ۇستازدارى مەن ستۋدەنتتەرى دە ساحنا تورىندە وزدەرىنىڭ جوعارى كاسىبي شەبەرلىگىن تانىتتى.

اباي قۇنانبايۇلىنىڭ مۇراسى بىر عاسىردان استام ۋاقىت وتسە دە, وزەكتى بولىپ قالا بەرەدى. ونىڭ ولەڭدەرى, اندەرى مەن فيلوسوفييالىق وي-تولعامدارى بۇگىنگى ۇرپاققا رۋحاني دەمەۋ بەرىپ, شابىتتاندىرادى. بۇل كەش ۇلى اقىننىڭ رۋحىنا قۇرمەت قانا ەمەس, ۇلتتىق ونەر مەن رۋحاني قۇندىلىقتاردى ناسيحاتتاۋعا باعىتتالعان ماڭىزدى مادەني ىس-شارا بولدى.