2026 jılğı 3 qaraşada Astana qalasında Prem'er-ministr Oljas Bektenovtiñ törağalığımen Ükimet otırısı ötti. Jiında Memleket basşısı Qasım-Jomart Toqaevtıñ 28 qazandağı Qazaqstan halqına arnağan «Jaña tarihi kezeñdegi Qazaqstannıñ özekti mindetteri» attı Joldauın iske asıru mäseleleri qaraldı.

Ükimet otırısında Prezident Joldauın jüzege asıru jönindegi Jalpıwlttıq is-şaralar josparınıñ jobası maqwldandı.

Jospar elimizdiñ äleumettik-ekonomikalıq damuınıñ 12 negizgi bağıtın qamtidı. Qwjatta barlığı 96 is-şara qarastırılğan.

Negizgi basımdıqtardıñ qatarında kölik jäne energetikalıq infraqwrılımdı damıtu, twrğın üy-kommunaldıq şaruaşılıqtı jañğırtu, önerkäsip pen auıl şaruaşılığın qoldau, sonday-aq cifrlıq tehnologiyalar men jasandı intellektini engizu mäseleleri bar.

Sonımen qatar käsipkerlikti damıtu, salıq jäne qarjı jüyesin jetildiru, halıqtı äleumettik qoldau, jalaqını arttıru jäne memlekettik basqaru tiimdiligin küşeytu bağıttarına erekşe nazar audarılğan.

Prem'er-ministr Oljas Bektenov barlıq josparlanğan is-şaralardı sapalı äri belgilengen merzimde orındau qajettigin atap ötti. Sonday-aq öñir äkimdikterine infraqwrılımdıq jobalardı jüzege asıru, äleumettik nısandar qwrılısın qamtamasız etu jäne su resurstarın tiimdi paydalanu tapsırıldı.

Jiın qorıtındısı boyınşa Wlttıq ekonomika ministrligine Ükimet apparatımen birlesip, Jalpıwlttıq jospardı bekitu turalı Prezident Jarlığınıñ jobasın äzirlep, Prezident Äkimşiligine engizu tapsırıldı. Osılayşa, Ükimet Prezident Joldauında belgilengen strategiyalıq mindetterdi iske asıruğa bağıttalğan naqtı is-şaralar josparın maqwldadı.