قازاقستان مەن ازەربايجان كاسپيي تەڭىزى ارقىلى جۇك تاسىمالداۋدىڭ تيىمدىلىگىن ارتتىرۋعا باعىتتالعان «كاسپيي كوپىرى» اتتى جاڭا جوبانى جۇزەگە اسىرماق. جاڭا جۇيە تەمىرجول ۆاگوندارىن جۇكتى تۇسىرىپ, قايتا تيەۋسىز تەڭىز ارقىلى تاسىمالداۋعا مۇمكىندىك بەرەدى.

بۇل ماسەلە قازاقستان رەسپۋبليكاسى كولىك مينيسترلىگىندە وتكەن كەزدەسۋدە تالقىلاندى. كەزدەسۋگە كولىك مينيسترى نۇرلان ساۋرانباەۆ, قازاقستانداعى ازەربايجان رەسپۋبليكاسىنىڭ ەلشىسى اليميرزامين الەسكەروۆ جانە AZCON Holding وكىلى شاحين باباەۆ قاتىستى.

جوبانىڭ نەگىزگى ەرەكشەلىگى – پارومداردى تەمىرجولدىڭ جالعاسى رەتىندە پايدالانۋ. وسىلايشا, ۆاگوندارداعى جۇكتى تۇسىرىپ, قايتا تيەۋدىڭ قاجەتى بولمايدى. بۇل تاسىمالداۋ ۋاقىتىن قىسقارتىپ, لوگيستيكالىق پروتسەستەردى وڭتايلاندىرۋعا مۇمكىندىك بەرەدى.

جوبانىڭ باستاپقى ماقساتى – جىلىنا 8 ميلليون توننا جۇك تاسىمالداۋ. الداعى ۋاقىتتا بۇل كورسەتكىشتى 10–12 ميلليون تونناعا دەيىن جەتكىزۋ جوسپارلانىپ وتىر.

ىنتىماقتاستىق اياسىندا «سامۇرىق-قازىنا» قورى مەن AZCON Holding «كاسپيي كوپىرى» جوباسىن دايىنداۋ جانە ىسكە اسىرۋ جونىندەگى كەلىسىمگە قول قويدى. سونىمەن قاتار «قازاقستان تەمىر جولى» مەن «ازەربايجان تەمىر جولدارى» اليات پورتىندا بىرلەسكەن ينتەرمودالьدى جۇك تەرمينالىن قۇرۋدىڭ نەگىزگى شارتتارىن بەكىتتى.

كەزدەسۋ بارىسىندا تاراپتار بىرلەسكەن تەرمينالدار جەلىسىن دامىتۋ, كەمە جانە لوكوموتيۆ جاساۋ سالاسىنداعى ىنتىماقتاستىقتى كەڭەيتۋ, تاريف ساياساتىن ۇيلەستىرۋ جانە جۇكتەردى ەۋروپاعا جەتكىزۋ ۋاقىتىن قىسقارتۋ ماسەلەلەرىن دە قاراستىردى.

جوبانى ىسكە اسىرۋ ترانسكاسپيي حالىقارالىق كولىك باعىتىنىڭ, ياعني ورتا دالىزدىڭ وتكىزۋ قابىلەتىن ارتتىرۋعا باعىتتالعان.

بۇل باعىت قازاقستاندى كاسپيي تەڭىزى ارقىلى ازەربايجانمەن جانە ودان ارى ەۋروپا ەلدەرىمەن بايلانىستىرادى. جاڭا باستاما قازاقستان مەن ازەربايجان اراسىنداعى كولىك-لوگيستيكالىق بايلانىستى نىعايتىپ, حالىقارالىق جۇك تاسىمالىنىڭ مۇمكىندىكتەرىن كەڭەيتۋگە باعىتتالعان.