Қазақстанда алдағы үш күнде ауа райы күрт құбылады. Антициклонның орнына солтүстік циклон келіп, еліміздің бірқатар өңірінде жауын-шашын күшейеді.

Синоптиктердің болжамынша, алдымен батыс аймақтарда, кейін республиканың басқа өңірлерінде жаңбыр жауады. Солтүстік өңірлерде жаңбыр мен қар аралас жауын-шашын түсіп, көктайғақ болуы мүмкін.

5–6 қарашада еліміздің батысы мен солтүстік-батысында қатты жаңбыр және қар күтіледі. Ал 6 қарашада оңтүстік және орталық өңірлерде нөсер жаңбыр жаууы ықтимал.

Сонымен қатар республика бойынша жел күшейіп, түнгі және таңғы уақытта тұман түседі.

Мамандар жүргізушілер мен жаяу жүргіншілерді жолда сақ болуға шақырады. Әсіресе көктайғақ болатын аймақтарда қауіпсіздік шараларын сақтаған жөн.