Qazaqstan Respublikası Prezidentiniñ Teleradiokeşeni Qıtayda ötken «Bir beldeu – bir jol» halıqaralıq BAQ ıntımaqtastığı forumına qatıstı.

İs-şara 3 qaraşada Qıtaydıñ Fuczyan' provinciyasındağı Fuçjou qalasında ötti. Forumdı «Jen'min' jibao» gazeti men Fuczyan' provinciyasınıñ ükimeti wyımdastırdı. Jiınğa älemniñ 100 elinen 182 bwqaralıq aqparat qwralı men wyımnıñ ökilderi qatıstı.

Forum barısında halıqaralıq aqparattıq ıntımaqtastıqtı damıtu, halıqtar arasındağı özara tüsinistikti nığaytu jäne jurnalister arasındağı käsibi baylanıstı keñeytu mäseleleri talqılandı.

Jiında Prezident Teleradiokeşeniniñ qwramına kiretin «Kazinform» halıqaralıq aqparat agenttiginiñ basqaruşı direktorı Dana Rısmwhamedova söz söyledi. Ol Qıtay törağası Si Czin'pinniñ «Bir beldeu – bir jol» bastamasın alğaş ret 2013 jılı Astanada tanıstırğanın atap ötti.

Sonımen qatar forum ayasında «Bir beldeu – bir jol» aqparattıq jelisi (BRNN) keñesiniñ törtinşi otırısı ötti. Onda qatısuşı elderdiñ bwqaralıq aqparat qwraldarı arasında jañalıqtar, foto jäne beynematerialdar almasudı damıtu, birlesken jobalar wyımdastıru jäne jurnalisterge arnalğan käsibi seminarlar ötkizu wsınıldı.

Ayta keteyik, Prezident Teleradiokeşeni men «Jen'min' jibao» gazeti arasındağı ıntımaqtastıq turalı memorandumğa 2024 jılı qol qoyılğan. Qwjat Qazaqstan men Qıtay arasındağı aqparattıq baylanıstı nığaytuğa bağıttalğan.