Қазақстанда ветеринария саласы мамандарының жалақысын кемінде 420 мың теңгеге дейін көтеру жоспарланып отыр. Бұл туралы 4 қарашада Құрылтайдың жалпы отырысында ветеринария мәселелеріне қатысты заң жобасын таныстыру кезінде мәлім болды.

Қазіргі уақытта ветеринар мамандарының орташа жалақысы шамамен 220 мың теңгені құрайды. Заң жобасы қабылданған жағдайда, олардың еңбекақысы екі есеге жуық өсуі мүмкін.

Құжатта ветеринарлардың әлеуметтік жағдайын жақсартуға бағытталған бірқатар шара қарастырылған. Атап айтқанда, мамандарға жыл сайынғы еңбек демалысы кезінде кемінде екі лауазымдық айлықақы мөлшерінде сауықтыру жәрдемақысын төлеу ұсынылып отыр.

Сонымен қатар ғылыми дәрежесі бар қызметкерлерге қосымша ақы төлеу және ветеринар мамандарды арнайы жұмыс киімімен қамтамасыз ету көзделген.

Аграрлық мәселелер, экология және табиғи ресурстар комитетінің төрағасы Серік Егізбаевтың айтуынша, заң жобасын жүзеге асыру үшін мемлекеттік бюджеттен жыл сайын шамамен 27 миллиард теңге бөлу жоспарланған.

Айта кетейік, аталған заң жобасы Құрылтайда бірінші оқылымда мақұлданды. Енді құжат заңнамалық рәсімдерден өтуі тиіс.