قازاقستان پرەزيدەنتى قاسىم-جومارت توقاەۆ 30 قازاندا تۇركييانىڭ انكارا قالاسىندا وتكەن تۇركى مەملەكەتتەرى ۇيىمىنىڭ 13-سامميتىنە قاتىستى. بيىلعى جيىن "تۇركى عاسىرى: تىلىمىز دە, ويىمىز دا, ىسىمىز دە - بىر" تاقىرىبىنا ارنالدى. سامميت بارىسىندا مەملەكەت باسشىسى تۇركى ەلدەرى اراسىنداعى ىنتىماقتاستىقتى ودان ارى نىعايتۋ, ساۋدا-ەكونوميكالىق بايلانىستاردى كەڭەيتۋ جانە ورتاق مادەني مۇرانى ساقتاۋ ماسەلەلەرىنە توقتالدى. پرەزيدەنتتىڭ ايتۋىنشا, بيىل قازاقستاننىڭ تۇركى مەملەكەتتەرى ۇيىمىنا مۇشە ەلدەرمەن وزارا ساۋدا اينالىمى 10 ميلليارد دوللارعا جۋىقتاعان. بۇل وتكەن جىلمەن سالىستىرعاندا 40 پايىزعا جوعارى. وسى كورسەتكىشتى ساقتاپ, ەكونوميكالىق ىقپالداستىقتى تەرەڭدەتۋ ۇشىن ۇيىمنىڭ 2027–2031 جىلدارعا ارنالعان ستراتەگيياسىن قابىلداۋدى جەدەلدەتۋ قاجەتتىگىن اتاپ وتتى. سونىمەن قاتار قاسىم-جومارت توقاەۆ "تۇركى مەملەكەتتەرى ۇيىمى +" فورماتىن دامىتۋدىڭ ماڭىزىن اتاپ, رەسەيدى وسى فورماتقا قوسىلۋعا نەمەسە ۇيىمعا باقىلاۋشى مارتەبەسىندە قاتىسۋعا شاقىرۋدى ۇسىندى. جيىندا كولىك-لوگيستيكا, تسيفرلاندىرۋ جانە جاساندى ينتەللەكت سالالارىنداعى سەرىكتەستىككە دە باسىمدىق بەرىلدى. مەملەكەت باسشىسى قازاقستاننىڭ وسى باعىتتارداعى تاجىريبەسىن باۋىرلاس ەلدەرمەن بولىسۋگە دايىن ەكەنىن جەتكىزدى. سونداي-اق كيبەرقاۋىپسىزدىك كەڭەسىن, تسيفرلىق مونيتورينگ جانە يننوۆاتسييالار ورتالىقتارىن قۇرۋ باستامالارىن ىسكە اسىرۋدى جەدەلدەتۋ قاجەتتىگىن ايتتى. بۇدان بولەك, پرەزيدەنت تۇركى حالىقتارىنىڭ تاريحي-مادەني مۇراسىن ساقتاۋ مەن دارىپتەۋ ماسەلەلەرىنە نازار اۋداردى. وسى باعىتتا تۇركى وركەنيەتىنىڭ مۇراسىن قورعاۋ جونىندەگى كونۆەنتسييانى قابىلداۋ جۇمىسىن جانداندىرۋدى ۇسىندى. سونداي-اق 2027 جىلى تۇركىستان قالاسىندا قوجا احمەت ياساۋي اتىنداعى حالىقارالىق فورۋم مەن مۋزەي ىسى ماماندارىنىڭ كەزدەسۋىن وتكىزۋ جوسپارلانىپ وتىرعانىن جەتكىزدى. مەملەكەت باسشىسى ۇيىمنىڭ ينستيتۋتسيونالدىق قۇرىلىمىن جەتىلدىرۋ قاجەتتىگىن دە اتاپ وتتى. ونىڭ پىكىرىنشە, بىرلەسكەن جۇمىستىڭ باسىم باعىتتارىن ناقتىلاپ, تۇركى مەملەكەتتەرى ۇيىمى جانىنان تۇراقتى وكىلدەر كەڭەسىن قۇرۋ ماڭىزدى. سونىمەن بىرگە قازاقستاننىڭ ۇيىمدى اسكەري الьيانسقا اينالدىرۋدى قولدامايتىنىن تاعى دا مالىمدەدى. سامميت قورىتىندىسى بويىنشا انكارا دەكلاراتسيياسى قابىلداندى. بۇعان دەيىن ۇيىمعا توراعالىق ەتكەن ازەربايجاننىڭ ورنىنا بۇل مىندەت تۇركيياعا وتتى. جيىنعا تۇركييا پرەزيدەنتى رەجەپ تاييپ ەردوعان, قىرعىزستان پرەزيدەنتى سادىر جاپاروۆ, وزبەكستان پرەزيدەنتى شاۆكات ميرزييوەۆ, تۇرىكمەنستان پرەزيدەنتى سەردار بەردىمۇحامەدوۆ جانە باسقا دا رەسمي تۇلعالار قاتىستى.