قازاقستاندا 50 جاستان اسقان ازاماتتاردى جۇمىسپەن قامتۋعا باعىتتالعان "كۇمىس جاس" جوباسى جالعاسىپ جاتىر. 2026 جىلدىڭ العاشقى توعىز ايىندا باعدارلاما اياسىندا 10,3 مىڭ ادام جۇمىسقا ورنالاسقان. بۇل تۋرالى قر ەڭبەك جانە حالىقتى الەۋمەتتىك قورعاۋ مينيسترلىگى حابارلادى.

جوباعا 50 جاستان اسقان, جۇمىس ىزدەپ جۇرگەن جانە مانساپ ورتالىعىندا جۇمىسسىز رەتىندە تىركەلگەن ازاماتتار قاتىسا الادى. باعدارلامانىڭ نەگىزگى ماقساتى – اعا بۋىن وكىلدەرىنىڭ ەڭبەك نارىعىنا قايتا ورالۋىنا كومەكتەسۋ جانە ولاردى تۇراقتى جۇمىسپەن قامتاماسىز ەتۋ.

جوبا اياسىندا جۇمىس بەرۋشىلەرگە قىزمەتكەردىڭ جالاقىسىنىڭ بىر بولىگىن وتەۋ ۇشىن مەملەكەتتىك سۋبسيدييا بەرىلەدى. قولداۋ مەرزىمى 36 ايعا دەيىن سوزىلادى. سۋبسيدييا مولشەرى جۇمىس كەزەڭىنە قاراي تومەندەگىدەي بەلگىلەنگەن: العاشقى 12 ايدا- جالاقىنىڭ 70%-ى; 13-24 اي ارالىعىندا- 65%-ى; 25-36 اي ارالىعىندا- 60%-ى.

بۇل رەتتە مەملەكەتتىك سۋبسيدييا كولەمى ايىنا 30 ايلىق ەسەپتىك كورسەتكىشتەن (اەك) اسپاۋعا تيىس.

باعدارلامانىڭ ماڭىزدى شارتتارىنىڭ بىرى- جۇمىس بەرۋشىنىڭ قاتىسۋشىنى جوبا اياقتالعاننان كەيىن دە جۇمىسپەن قامتاماسىز ەتۋى. زەينەت جاسىنا جەتپەگەن ازاماتتار ۇشىن تۇراقتى جۇمىس ورنى كەمىندە بىر جىلعا ساقتالۋى كەرەك. ال 58 جاستان اسقان قاتىسۋشىلار زەينەت جاسىنا جەتكەنگە دەيىن جۇمىسىن جالعاستىرا الادى.

مينيسترلىك مالىمەتىنشە, باعدارلاماعا قاتىسۋشىلاردىڭ 54,7%-ىن ايەلدەر, ال 61%-ىن اۋىل تۇرعىندارى قۇرايدى. جۇمىسقا ورنالاسقانداردىڭ باسىم بولىگى تۇركىستان, قاراعاندى, اقتوبە جانە جامبىل وبلىستارىنا تيەسىلى.

جوباعا قاتىسۋ ۇشىن ازاماتتار تۇرعىلىقتى جەرى بويىنشا مانساپ ورتالىعىنا جۇگىنىپ, جۇمىسسىز رەتىندە تىركەلۋى قاجەت. سونىمەن قاتار, تىركەلگەن جۇمىسسىزدار Enbek.kz ەلەكتروندىق ەڭبەك بيرجاسى ارقىلى قولجەتىمدى بوس جۇمىس ورىندارىن تاڭداي الادى.

ايتا كەتەيىك, "كۇمىس جاس" جوباسى 2022 جىلدان بەرى جۇزەگە اسىرىلىپ كەلەدى. ول تاجىريبەلى مامانداردىڭ كاسىبي الەۋەتىن ساقتاۋعا جانە ەڭبەك نارىعىنداعى مۇمكىندىكتەرىن كەڭەيتۋگە باعىتتالعان.