قازاقستاندا جۇمىس ىزدەۋشىلەرگە قولداۋ كورسەتۋدىڭ جاڭا جۇيەسى ەنگىزىلىپ جاتىر. ەڭبەك جانە حالىقتى الەۋمەتتىك قورعاۋ مينيسترلىگى «تسيفرلىق جۇمىسپەن قامتۋ قىزمەتى» جوباسى اياسىندا ازاماتتاردى جۇمىسقا ورنالاستىرۋعا جاردەمدەسۋدىڭ جاڭا تاسىلىن ىسكە اسىرۋدا. جاڭا جۇيەنىڭ باستى ەرەكشەلىگى – جۇمىس ىزدەپ جۇرگەن ازاماتتاردى وزدەرى مانساپ ورتالىقتارىنا جۇگىنگەنگە دەيىن انىقتاپ, ولارعا الدىن الا كومەك ۇسىنۋ. بۇل تۋرالى مينيسترلىكتىڭ 13 قاراشاداعى رەسمي حابارلاماسىندا ايتىلدى.

جوبا اياسىندا ازاماتتار Enbek.kz ەلەكتروندىق ەڭبەك بيرجاسى ارقىلى جۇمىس ىزدەي الادى. ولاردىڭ كەلىسىمىمەن بىلىمى, ەڭبەك وتىلى مەن كاسىبي داعدىلارى كورسەتىلگەن تسيفرلىق تۇيىندەمە اۆتوماتتى تۇردە قالىپتاستىرىلادى. سونىمەن قاتار جاساندى ينتەللەكت ازاماتتىڭ بىلىكتىلىگىنە سايكەس بوس جۇمىس ورىندارىن ىرىكتەپ, جەكە ۇسىنىستار ازىرلەيدى. ارنايى جي-كومەكشى ۇيالى تەلەفون ارقىلى جۇمىس ىزدەۋشىلەرمەن بايلانىسىپ, ەڭبەك جاعدايلارى, بوس ورىندار جانە وقىتۋ مۇمكىندىكتەرى تۋرالى اقپارات بەرەدى. جاڭا جۇيەدە مانساپ ورتالىقتارىنىڭ ماماندارىنا دا ماڭىزدى مىندەت جۇكتەلگەن. ولار ازاماتتارعا تۇيىندەمە دايىنداۋعا, جۇمىس ورىندارىنا وتىنىم بەرۋگە جانە جۇمىس بەرۋشىلەرمەن بايلانىس ورناتۋعا كومەكتەسەدى. ەگەر ادام جۇمىسقا ورنالاسا الماسا, ونىڭ سەبەپتەرى انىقتالىپ, ارى قارايعى ارەكەتتەر جوسپارلانادى.

جوبا 2026 جىلدىڭ شىلدەسىنەن باستاپ پاۆلودار جانە ماڭعىستاۋ وبلىستارىندا جۇزەگە اسىرىلىپ كەلەدى. وسى ۋاقىت ارالىعىندا 59,2 مىڭ ازاماتقا جۇمىسپەن قامتۋ شارالارى ۇيىمداستىرىلىپ, 7,5 مىڭ ادام جۇمىسقا ورنالاسقان. مينيسترلىك 2026 جىلدىڭ سوڭىنا دەيىن جاڭا قىزمەتتى قازاقستاننىڭ بارلىق وڭىرىنە كەزەڭ-كەزەڭىمەن ەنگىزۋدى جوسپارلاپ وتىر.